落注煤股要识拣 内蒙有矿更实际

　　上周讲过新股南戈壁(1878)有中投同淡马锡等撑腰，加上系加拿大以外地区第二上市，所以定价会较资产净值高啲。随着南戈壁高调招股上市，炒影子股手影开始慢慢浮面。

　　先唔讲几只煤股走势，最新加入呢个「蒙古黑炭头俱乐部」仲有中国秦发(866)，去年尾突然宣布透过全资附属公司，收购鄂尔多斯市巴音孟克纳源煤炭 60%股权，总代价 8.57亿元人民币。仲话矿场近 30平方公里，获授权采矿的煤炭储量约 1.59亿吨，预计年产至少 90万吨。咁储量咪仲多过南戈壁嘅 1.4亿吨。

　　点都好，煤炭热已成为新炒作板块，而充满神秘色彩嘅蒙古资源，相信会陆续被「翻叮」大炒。不过炒时炒，大家唔好以为只得蒙古有矿产资源，其实单系中国境内，煤产量已喺世界名列前茅。最新数据显示，内蒙去年煤炭产量 6.37亿吨，已超越山西，成为中国最大产煤省分。内蒙人应该几有钱，因为佢连续 7年高踞全国 GDP增速第一，北京 80%电力来源都系内蒙，今年全省原煤计划产量 7.3亿吨，增 16%，拍得住当地 GDP。

　　内蒙有矿更实际

　　相比内蒙，蒙古面积虽大，但已知嘅煤蕴藏量较少，据官方数字约 500亿至 1520亿吨，但胜在开采得少，目前只系掘咗约 500万吨，亦系呢个原因吸引咁多外资入去掘金。蒙古最多系黄金同铜，已知金矿有 300几个，储量 3400吨、铜量 40亿吨，分别排亚洲第一、二位。不过，即使量大亦有运输困难，交通铁路网未掂，之所以点解喺蒙西有矿嘅蒙古能源(276)迟迟未有煤运出。

　　蒙古热系概念、系憧憬，而唔系可以快速带动公司盈利增长嘅引擎。反而实实在在，喺内蒙嘅全中国最大神府东胜煤矿就非常成熟，自 07年已成为国家首个亿吨级煤炭基地，产量连续 10年创新高， 08年有 1.27亿吨，系中国神华(1088)未来盈利增长最大动力，加上神华有齐铁路运输等配套，运出运入冇难度。另一方面，短线睇煤价升，最能捕捉系具价格弹性嘅兖州煤业(1171)；中煤能源(1898)就货源归边，基金同大股东揸近 84%。胡孟青